KALIBO, Aklan—Naga-abot eon sa 15 nga mga business establishment sa probinsiya it aklan ro nataw-an it Department of Trade and Industry ukon DTI it safety seal certificate.
Raya sigon hay halin sa mga nag-apply sa DTI Safety Seal Microsite.
Suno kay Maria Carmen Iturralde, acting DTI-Aklan Provincial Director nga antes nga mataw-an it safety seal hay nagapatigayon anay sanda it on-site inspeksyon agud nga matumod kon nakakasunod sa minimum health protocol kontra covid 19 ro sangka establisimento.
Ro mga gintaw-an suno kana nga mga establisimento hay naghalin sa banwa it kalibo ag isla it boracay nga ginaeakipan it mga groceries, supermarkets, hardware stores, convenient stores, logistics service provider , barber shops, service and repair shops ag iba.
Gindugang pa ni Ituralde nga nag-agi sa maid-id nga inspeksyon ag deliberasyon antes ro pag-apruba.
Tuyo sigon kara nga masiguradong dere-deretso nga mapatuman ro safety ag health protocols sa tanan nga establisyimento para sa kaeowasan it tanan kaibahan eon ro mga bumaeakae.
May an-um nga buean sigon ro validity it safety seal.
Kaibahan man sigon nanda nga ahensiya nga naga-isyu it Safety Seal Certification hay ro Department of Labor and Employment, Department of Health, Department of the Interior and Local Government ag Department of Tourism agud nga mabalanse ro ekonomiya ag ikamayad nga eawas sa tunga it COVID-19 pandemic.
Bukon sigon raya it mandatory apang plus factor sa mga establisimento para sa andang mga customer.
Owa man sigon it bayad ro pag-isyu kara.
