KALIBO, Aklan—Nagapadayun pa ro search and rescue operation it mga katapo it Municipal Disaster Risk Reduction Management Council (MDRRMC) ag iba pang natungdan nga ahensya it gobyerno para matumod ro lokasyon it sangka binatilyo nga naeumos sa suba sa boundary it Brgy. Jumarap ag Linabuan Sur sa banwa it Banga.
Sa makaron padayun pang gina-usoy ro biktima nga si Whyzly Francisco, 16-anyos samtang maswerte man nga nakaeowas ro kaibahan kara nga si Zues Andrew Lifardo, 15-anyos.
Suno kay Andy Alfaro, sangka residente sa lugar nga bandang alas-11:00 kaina it agahon kat nakita kara nga naga-eangoy ro daywang biktima patabok sa suba.
Nahimo pa sigon ni Lifardo nga makatabok apang napas-eawan si Francisco rason nga nagpangayo eon raya it tabang.
Nakabuyot pa sigon raya sa sangka puno it niyog apang nakabuhi man.
Ginasugid nga ginhana pa raya nga buligan it anang mga kaibahan apang masyadong maeayo ro distansya it biktima.
Sa pihak nga parte, sa pag-istorya man ni Solpicio Francisco Jr., lolo it biktima nga masobra tatlong dominggo eon nga una sa anang puder si Whyzly matapos raya nga mag-uli kana.
Ginasugid nga separado ro mga ginikanan it biktima ag una raya sa pagpangalaga it anang ina.
Ginapahayag nga pasado alas-10:00 kaina kat ulihi nana nga makita ro anang apo samtang nagapamantaw it television.
Owa sigon nana ginapasugtan nga mag-adto ukon magpaligos sa Aklan river ro anang mga apo rason nga nakibot eon lang imaw kat makaabot kana ro balita.
Dugang pa kara nga parehong indi kantigo mag-eangoy sanday Zeus ag Whyzly.
