Kapin sa 1,614 halin sa target numbers nga masobra sa 8,000 beneficiaries ro pinal nga ginkakas sa Pantawid Pamilyang Pilipino Program ukon 4P’s sa bilog nga probinsya it Aklan.
Suno Beverly Salazar, 4p’s provincial link ro mga nakakas sa listahan hay inde eon makabaton it cash aid maghalin sa gobyerno umpisa makaron nga buean it Oktobre.
Sa masunod nga dominggo sigon hay magapanupod eon sanda it acknowledgement receipt sa mga identified de-listing beneficiaries kon siin pagapirmahan nanda raya nga nagapamutuod nga ginabaton nanda nga uwa eon sanda sa programa.
Naging basehan it Department of Social Welfare and Development ukon DSWD sa pagkakas sa programa it nasambit nga mga miyembro hay makabig eon ro mga raya nga non-poor ukon ro may ikasarang eon sa pagpangabuhi kaparehas it nakatapos eon ro andang mga onga, may trabaho eon ro miyembro it pamilya ag may nagasuporta eon sa mga raya.
Samtang sa pihak nga parte, gin-umpisahan eon sa banwa it Madalag ro pagpanupod it cash card sa mga unconditional cash transfer ukon UCT members nga ginakaeakipan it mga senior citizens.
Ro nasambit nga cash card hay may sueod nga nagabalor it masobra sa P4,000 pesos.
Ro mga nakasueod sa listahan it UCT hay makabig nga indigent indibidwal kon siin mabahoe raya nga bulig sa mga magueang maskin pambakae eon lang it andang bueong.
