KALIBO, Aklan— Nagapadayun ro pagtugis it pulisya sa sangka eaeaking naka-motorsiklo matapos nga gina-alegar nga ginbuytan kara ro buli it 18-anyos nga daeaga samtang nga nagatikang sa daeanon it Barangay Tinigaw, Kalibo, Aklan.
Base sa paunang imbestigasyon it Kalibo Police Station, samtang nga nagatikang ro biktimang si alyas “Nene”, residente it nasambit nga lugar hay may nag-agi nga nakamotorsiklong eaeaki nga kun sa siin hay ginasugid nga gulping nagbalik ag gindakma ro anang buli.
Nagsinggitan sigon ro daeaga bangud sa kakibot rason nga ginpaharurot it driver ro anang motorsiklo nga kulay itom nga may kombinasyon nga pink.
Angot kara, gulpi nga nagsakay it tricycle ro daeaga ag gin-eagas ro suspek apang owa eon nanda raya naabutan bangud sa kadasig it anang pagmaneho.
Ro insidente hay ginpa-record it biktima agud nga makatau it awareness sa iba pang kababayin-an.
Sa makaron hay nagapadayun pa ro pag-review it CCTV footages sa mga posibleng gin-agihan kara nga lugar para sa posibleng pagtumod sa anang identity.
Samtang, gindugang pa it daeaga nga makilaea nana ro suspek sa oras nga maka-atubang nana raya bangud nga bukas sigon ro suksok kara nga helmet sa anang itsura.
