KALIBO, Aklan — Umpisa ko Miyerkules nga adlaw, Oktubre 30 hay ginpakalhit eon ro pilang mga kapulisan sa nagkaeain-eain nga mga sementeryo sa bilog nga Western Visayas.
Suno kay P/Lt. Col. Arnel Solis, tagapaghambae it Police Regional Office-6 nga nag-deploy sanda it kabilugan nga 1,900 nga mga police agud nga magbantay sa All Saints’ ag All Souls Day sa bilog nga rehiyon.
Nauna eon sigon nga ginmandu ni Police Brig. Gen. Jack Wanky, hepe it PRO-6 sa tanan nga mga police chiefs sa Aklan, Antique, Capiz, Guimaras, Iloilo, ag Negros Occidental kamana man sa mga siyudad it Iloilo ag Bacolod nga ipatuman ro andang natungdan nga security plans para sa long weekend.
Hasta sa makaron hay owa sanda it na-monitor nga anuman nga insidente kun sa siin target nanda ro zero incidents sa makaron nga selebrasyon.
Ginpakalhit ro mga kapulisan sa mga sementeryo, simbahan , terminal it bus, mga pantalan , paeuparan ag iba pang mga matawong lugar.
Kabulig sigon nanda sa pagbantay ro local government units, iba pang law enforcement agencies, force multipliers, advocacy support groups ag iba pa para sa maayos ag malinong nga pagdumdum it Undas.
Mag-eowas kara, may mga pulis man sigon nga nagapatigayon it police visibility pinaagi sa mobile patrol, foot patrol ag motorcycle patrol.
Sa pihak nga parte, agud nga indi madisturbo ro pagbisita sa andang mga mahae sa kabuhi nga nagtaliwan eon, gin abisuhan ni Lt. Col Solis ro tanan nga likawan nga magdaea it mga baril, mga mataeum nga hinganiban, gambling paraphernalia, sound system ag iba pang ginabawae sa pag-agto sa mga sementeryo.
Magapabilin ro deployment hasta sa Nobyembre 3 bangud sa long weekend.
Ginpaandaman man nana ro tanan nga maging alerto agud nga indi mabiktima it mga nagkalhit nga mga maeain nga element .
