KALIBO, Aklan — Ginkasuhan it pag-eabag sa RA 10591 ukon Comprehensive Firearms and Ammunition Regulation Law ag direct assault ro daywang empleyado it kilaeang Henann Resort sa Boracay matapos maboe-an it baril ag nagpangbayo sa pulis nga nagdakop kanda sa Station 2, Barangay Balabag sa isla.
Nakakulong eon makaron ro mga suspek nga sanday Reynaldo Buenafe, 39, ag Carlo Vargas, 41, parehong stay-in technician it resort ag mga residente it Poblacion East, Zone 2, Oton, Iloilo.
Suno kay Chief Inspector Ruel Firmo, hepe it Malay Police Station nga ginhana pang makihalo it mga suspek sa maabong tawo sa sangka Halloween party matapos maglinagsanan.
Base sa report, samtang nagapatigayon it foot patrol ro daywang pulis sa beach front hay nataeopangdan it mga raya ro daywa nga nagahithit it sigarilyo nga ginabawae sa baybayon it isla.
Matapos madakpan, nabueo kay Buenafe ro sangka kalibre .38 nga baril nga kargado it an-om nga bala samtang ginbinayo man ni Vargas ro sangka pulis nga pilit imaw nga ginapusasan.
