KALIBO, Aklan — Daywang international cruise ships nga may sakay nga libo-libong turista ro nakataeanang magdungka makaron nga buean it Nobyembre sa isla it Boracay.
Suno kay Caticlan jetty port administrator Nieven Maquirang, sangka mabahoe nga returning ship ro maga dungka sa maabot nga Nobyembre 21 nga maga bisita sa Boracay sa ikaywang kahigayunan.
Paga sundan raya it pagdungka it MS World Dream nga pang-11 cruise ship nga magabisita sa isla sakay ro kapin sa 4,000 nga mga pasahero ag 1,900 nga crew.
Umpisa alas-7:30 it agahon hay maga pamasyar ro mga turista sa bug-os nga isla ag maga patigayun it magkaeain-eain nga sea sports activity hasta it alas-4:30 it hapon.
Bangud sa kauna-unahang pagbisita it barko, sangka programa ag exchange of plaques ro pagahiwaton.
Gin pahayag ni Maquirang nga lima pang cruise ship ro gina eauman nga maga dungka sa Boracay bago magtapos ro presenteng dag-un.
