2 katawo eon ro kumpirmadong namatay samtang 92 ro ninahan sa pagpaneasa it Typhoon Yagi sa China partikular eon sa island province it Hainan. Suno sa local authorities, ro 2 nga namatay ko Sabado hay sa Ding’an County samtang nakalista man it 12 indibidwal nga naninahan sa Wenchang city ag 80 man ro napabalita nga naninahan sa Haikou.
Biyernes kat kamakaywang beses nga nag-landfall ro bagyo sa China nga unang nagdaeasa sa Hainan bago tumbukon kara ro Guangdong province. Nagsuspendi eon man it mga klase sa eskwelahan ko rayang Biyernes ro pilang lugar sa southern China kaibahan ro Guangzhou, Shenzhen, ag Yangjiang samtang gin-postponed man it mga unibersidad ro pag-umpisa it andang academic year.
Pilang flights eon man ro kinansela sa rehiyon bangod sa bagyo. Samtang, nag-landfall ro Super Typhoon Yagi, kahapon sa northern Vietnam partikular eon sa Hai Phong ag Quang Ninh provinces. May angkon raya nga kabaskog it hangin nga eagpas sa 149kmh suno sa National Centre for Hydro-Meteorological Forecasting.
Naghalin eon man ro haeos 50,000 katawo halin sa coastal towns ag nagpadaea man ro gobyerno it 450,000 military personnel para sa rescue operations. Sinuspendi eon man ro mga operasyon it pilang oras sa 4 nga paeoparan kahapon kaibahan ro Noi Bai sa Hanoi nga nagresulta sa kanselasyon it 300 flights.
Ginkansela man ro mga klase sa eskwelahan sa 12 northern provinces kaibahan eon sa kabisera it Hanoi.
