KALIBO, Aklan—Napas-eawan ro committee on laws, rules and ordinances ag committee on indigenous peoples, person with disabilities and senior citizens it sangguniang panlalawigan nga matumod kon may nagakaigo nga basehan ro pagbawi sa eugta it 44 nga Aeta sa isla it Boracay nga gintau it gobyerno ko tiempo it administrasyong Duterte.
Suno kay Aklan second district board member Jay Tejada, owa nanda na-establish sa ginpatigayon nga pag-usisa in aid of legislation it daywang komitiba kon legal ro pag-take-over it land developer sa property it mga katutubong ati sa pihak nga ro isyu sa Certificate of Land Ownership Award ukon CLOA hay naka-pending pa sa korte hasta sa makaron.
Raya hay bangud nga owa sanda it ginabuytan nga dokumento sa gina-alegar it Department of Agrarian Reform ukon DAR nga may finality eon ro decision for cancellation.
Pila sa mga gusto pa sigon nanda nga mausisa hay ro protocol it DAR ag Registry of Deeds sa pagserbi it notice of finality of cancellation.
Dugang pa ni board member Tejada nga indi sanda makapasilabot sa merito it kaso bangud nga bukon sanda it korte.
Gusto eamang sigon nanda nga masayuran kon naeabag ro tawhanong kinamatarung it mga katutubong ati ag ensakto ro proseso it pagtake-over sa andang property.
Raya hay kasunod it panindugan it mga katutubong ati nga owa sanda it ginabuytan nga kopya nga kanselado eon ro gintau kanda nga 1,282-square meter nga eugta.
Ginklaru man it opisyal nga may bitbit ro DAR nga photo copy it final cancellation apang owa ro proof of service nga nabaton it mga katutubong ati ukon andang abogado ro nasambit nga dokumento nga ginabawi eon kanda ro eugta.
Madumduman nga ko nagtaliwan nga Marso 26 it agahon hay nakibot eon lang ro mga ati kat ginsued ag ginkuraean it mga armadong kaeaeakin-an ro andang eugta.
Nobyembre 2018 kat gintau kanda ni dating presidente Duterte ro eugta pinaagi sa collective CLOA.
