KALIBO, Aklan — Nagapadayun ro imbestigasyon it kapulisan sa natabu nga aksidente sa daeanon nga ginkamatay it daywang eaeaki nga ginadudahan nga una sa impluwensiya it aeak matapos nga bumunggo ro andang motorsiklo sa metallic road barrier bandang alas-7:30 it gabi-i it Huwebes sa Brgy. Bugtong Bato,Ibajay.
Namatay eagi ro rider it motorsiklo nga nagapang-edaron it 30-anyos samtang namatay mat’a sa Ibajay District Hospital ro backrider kara nga 22-anyos, parehong residente it nasambit nga lugar.
Suno kay P/Lt. Nina Pagunsan , deputy chief of police it Ibajay Municipal Police Station nga base sa imbestigasyon nga antes nga natabu ro insidente hay ginasugid nga nagasunod ro mga biktima sa sambilog pang motorsiklo it andang kabarkada paagto kunta sa kaiping nga barangay it Naisud sa nasambit nga banwa kat andang araduhon ro barrier sa pakurbadang daeanon rason nga inapok ro mga raya halin sa andang ginasakyan nga motorsiklo.
Ro daywa hay nag-angkon it grabeng lastro sa nagkaeain-eain nga parte it andang eawas partikular sa ueo .
Duda it pulisya nga naduea-an it kontrol sa manibela ro driver bangud sa madasig nga pagpadaeagan it motorsiklo rason nga natabu ro makangieidlis nga aksidente.
Sa pag-usisa, owa it plate number ro andang motor ag parehong owa man it suksok nga helmet ro mga biktima.
Sa pihak nga parte, grabe ro kasubo nga nabatyagan ni Meriam Aguilar, ina it namatay nga driver it motorsiklo.
Suno kana nga nakibot imaw matapos nga padaehan it litrato it anang unga nga nagapaligos sa anang kaugalingon nga dugo .
Insigida sigon sanda nga nagpahaum it asawa it biktima nga parehong nagatrabaho sa Boracay agud nga mag-uli.
Ginsaysay pa nana nga antes nga natabu ro makangieidlis nga aksidente hay naghinangae kana ro anang unga angot sa kamatayon.
