KALIBO, Aklan—Naabot ag naeampasan pa it Malay Municipal Tourism Office it lokal nga gobyerno it Malay ro andang target nga naga-abot eon makaron sa masobra sa 2 million ro turistang nagbisita sa Isla it Boracay umpisa Enero 1 hasta Disyembre 20 it makaron nga dag-on.
Suno kay Malay Municipal Tourism Officer Felix delos Santos nga nag abot sa 2,041,821 ro numero it mga nagbakasyon sa isla, mas mataas sa projected tourist arrival nga 1.8 million.
Raya hay ginaeakipan it local tourist nga may 1,600,976 ukon 76 percent it kabilugan nga tourist arrivals samtang ro foreign tourist hay 402,649 ukon 23 percent ag ro overseas Filipinos hay umabot sa 38,196 ukon 1 percent.
Bangud kara, nanawagan si delos Santos nga paumwaron pa ro tourism industry sa Boracay agud nga eubusang makabangon halin sa pagkalugi bangud sa pandemya.
Samtang, bangud nga buhos eon ro mga turista sa Boracay makaron nga kapaskwahan hasta sa pagsug-aeaw sa Bag-ong Dag-on nga ginakabig nga super peak, haeos fully-booked eon ro maabung hotel ag restaurant sa isla.
Eauman man suno kana ro 20 percent nga pagtaas sa mga hotel rates.
Gin abisuhan man kara ro mga bakasyunista nga magpa-book it temprano ag kon pwede hay direktang makipag-transaksyon sa mga DOT accredited nga accommodation establishments agud nga indi mabudol.
Sa pihak nga parte, bangud nga limitado eamang ro numero it mga beach guards sa isla, hasta sa alas-7:00 eamang it gabi-i ginapasugtan nga magpaligos sa baybay.
Para sa dugang nga kasayuran angot sa mga ginapatuman nga patakaran, pwedeng mag-agto ukon mag download it Boracay Info Guide App.
