Nagpaandam ro mga awtoridad sa France kontra sa pilang condom nga ginabaligya online ag sa mga botika matapos i-recall ro ginaboeobanta nga 260,000 bilog bangud sa posibleng peligro sa kaeowasan.
Nagguwa sa laboratory tests nga may pilang condom nga may gabot ukon pwedeng mag-eupok samtang owa man nakapasa ro pila sa durability tests nga nagasukat sa katibay hasta sa expiration date.
Ginalaygayan ro mga nakagamit eon it apektadong produkto nga magpa-examine para sa sexually transmitted diseases ukon STDs ag magpatigayon it pregnancy test kun ma-delay ro menstruation.
Natumod man it French authorities ro 30 nga product lines sa online marketplaces nga owa it nagakaigo nga CE marking ukon French labeling, kun sa siin masobra sa 40,000 nga condom ukon ginaboeobanta nga 1,000 nga kahon ro naibaligya bago mabo-oe sa mga listing.
Kaibahan sa mga non-compliant nga produkto ro daywang condom halin sa Japanese company nga Okomoto Industries, kamana man ro French brands nga My Lubie ag Friday Bae.
Samtang, ginpahayag it My Lubie nga sangka batch eamang ro sakop it recall ag nakapasa sa safety standards ro produkto sa follow-up tests.
