KALIBO, Aklan—Ginpaidaeum eon sa inquest proceedings sa Aklan Prosecutors Office sa kasong pag-eabag sa Presidential Decree 1602 ukon Illegal Cockfighting Law ro tatlong ka mga kaeaeakin-an matapos nga madakpan sa illegal nga pagbueo-bueo sa Purok 4 C. Laserna St. Kalibo.
Ginkilaea ro tatlo nga sanday Romulo Gomez, 64-anyos; Wilmer Cawaling, 61-anyos ag Jenny Manahan, 33-anyos ag parehong residente it Oyo Torong St. Kalibo.
Suno kay P/Major Willian Aguirre, head it Provincial Intelligence Unit it Aklan Police Provincial Office ukon APPO nga ro operasyon hay pinaagi sa gintingub nga pwersa it Kalibo Municipal Police Station ag provincial illegal task force.
Narekober sa mga raya ro daywang ka mga manok nga pambueang, tari ag kapin sa P990 pesos nga kantidad it kwarta nga ginamit bilang taya.
Ro tatlo hay insigidang gindaea sa Kalibo PNP kon siin sanda temporaryong ginkustudiya para sa nagakaigong disposisyon.
Samtang, sa buean it Enero hay tatlo eon ro andang accomplishments matapos ro sunod-sunod nga operasyon kontra sa mga illegal activities sa probinsiya.
Nnagapabilin sigon nga bawae ro pagtipon-tipon makaron kasunod it pagtaas it kaso bangud sa Omicron variant it COVID-19.
