KALIBO, Aklan—Nagpatigayon it libreng operation tuli ag dental mission ro 33rd CMO company it Philippine Army sa barangay hall it Cawayan sa banwa it New Washington.
Suno kay 2nd Lt. Ryan Bastan, acting company commander it 33rd CMO company nga tuyo kara nga mataw-an it atensyon ro ikamayad nga eawas it mga pumueuyu sa nasambit nga banwa.
Naging madinaeag-on suno kana ro andang aktibidad bangud nga nag-eampas sa target nga quota ro nagpalista nga benepisyaryo.
Imbes nga 110 sa libreng tuli ag 110 man sa dental ro andang target hay maabu ro nagpila ag nakapanipueos nga mga residente nga umabot it hasta sa 130, kun sa siin bukon eamang ro mga taga-Cawayan ro nag avail kundi ro iba pang mga pumueuyu it kaiping nga barangay.
Naging kaibahan nanda sa aktibidad ro mga stakeholders nga ginpangayuan nanda it bulig nga kaeabanan nga naghalin sa siyudad it Iloilo kamana sa LGU-New Washington ag sa kapulisan.
Sa pihak nga parte, sa Disyembre 2 hay magapatigayon man ro Philippine Army it gift giving ukon pagpanupod it 300 nga tsinelas sa mga estudyante it Cawayan Elementary School halin grade 1 hasta grade 4.
Mag-eowas kara, magahimo man sanda it feeding program kun sa siin masobra man sa 300 pupils ro makapanipueos.
