KALIBO, Aklan–Arestado ro sangka manakaw matapos nga maaktuhan nga ginatakaw kara ro pouch ag cellphone sa sueod sangka panimaeay sa Brgy. Pusiw, Numancia.
Ro suspek hay ginkilaea kay Emelito Alapas ,34 anyos ag residente it Bakhaw Norte, Kalibo samtang ro biktima hay nakilaea man kay Joan Alayacyac Talislis, 37 anyos ag residente it nasambitan nga lugar.
Base sa imbestigasyon it mga otoridad, nakibot eamang ro biktima nga una eun ro suspek sa sueod it andang baeay ag buyot eun ro anang pouch nga may sueod nga P500 nga cash ag sangka cellphone.
Bangud kara hay gilayon man nga nagpangayo it bulig ro biktima nga ginrespondehan man it Numancia PNP kung sa siin natigayon nga maaresto ro suspek.
Nasayuran nga sa bintana it panimaeay it biktima nag-agi ro suspek.
Madumduman nga ko dag-on 2018 hay ginpasakaam man ro suspek it kaso bangud man sa pagpanakaw.
