KALIBO, Aklan—Kulong ag nagapangatubang sa kaso ro ap-at nga sabungero matapos maaresto sa ilegal nga tupada sa magkaseparadong lugar sa probinsiya it Aklan tuga it ginabawae nga mga pagtipon-tipon bangud sa COVID-19.
Domingo it agahon kat magpatigayon it operasyon kontra ilegal nga tupada ro mga operatiba it lezo police station sa Barangay Mina, Lezo.
Naaresto it mga pulis sanday Arnold Pamatian, 33 anyos, ag Glenn Del Rosario, 36 anyos, parehong residente it nasambit nga lugar.
Narekober man ro sangka pangbueang nga manok ag P240 pesos nga ginapatihan nga pusta.
Nabo-oe pa sa lugar ro 2 cellphone ag tatlong owa it pares nga tsinelas.
Sa pihak nga parte, sa Sitio Ilaya, Brgy. Rosario, Malinao, nadakpan man sa akto it mga pulis nga nagapa-tupada sanday Jovil Rondario, 34 anyos it brgy. Navitas ag Helbert Retilba, 31 anyos it Brgy. Rosario sa nasambit nga banwa.
Matapos sigon nga matunugan ro pag abot it mga pulis hay nagdaeaeagan sa magkaibang direksyon ro ginatantiya nga 30 nga mga sabongero , apang nadakpan ro daywa.
Nabo-oe sa posisyon ni Rondario ro P220 pesos nga kwarta ag kay Retilba hay P860 pesos.
Nakumpiska man it pulis ro tatlong pagbueang nga manok ag 270 pesos nga nahueog halin sa mga nagpaeagiw nga suspek.
Kasong pageabag sa Presidential Decree 449 o Cockfighting Law of 1974 ro ginpasaka sa mga naarestong suspek.
