KALIBO, Aklan—Uman eon man nga umatake ro mga kawatan matapos nga sunud-sunod nga tinakawan ro ap-at nga baraka sa pabahay sa Brgy. Briones, Kalibo, agahon it Martes, Hunyo 10.
Magkasunod nga gintakawan it owa pa nakilaea nga mga suspek ro sari-sari store nanday Princess Fernandez, Alena del Rosario ag daywang iba pa.
Suno kay Fernandez nga pagbugtaw nana it alas-3:30 it aga-aga hay owa eon ro anang bag sa anang kilid ag bukas eon ro pwertahan it andang baraka.
Naga-abot sa masobra sa P1,400 nga cash ro ginbo-oe kana.
Owa sigon nanda napan-uhan ro pagsueod it mga suspek.
Suno kana nga raya ro unang kahigayunan nga gintakawan ro mga baraka sa andang lugar sa Phase 3, apang eapnaag eon sigon ro mga insidente it panakawan sa iba pang mga parte it pabahay ko nagtaliwan nga mga binuean.
Sa pihak nga parte, sa katabok nga baraka nga ginapanag-iyahan ni Alena del Rosario, natukiban man nana nga gintakaw ro anang mga baligya nga sigarilyo, aeak, softdrinks, mga delata, itlog nga maaeat ag iba pang groceries .
Ginaboeobanta nga masobra sa P6,000 ro kantidad it mga baligya nga gintakaw kana .
Narekober it mga kapulisan ro bolt cutter nga ginapatihan nga gingamit it mga manakaw sa pag-bringka sa padlock it andang mga baraka.
Apela it mga biktima ag iba pang residente sa LGU-Kalibo nga mabutangan eon it street light ag CCTV ro andang lugar.
