KALIBO, Aklan—Patay ro sangka 41-anyos nga eaeaki matapos nga ginbaril it owa pa makilaeang suspek sa Sitio Guba, Brgy. Tigayon, Kalibo.
Nakilaea ro biktima nga si Jury Felizario, residente it nasambit nga lugar.
Ginasugid nga naga-init it tubi ro biktima kat gulpi eamang imaw nga ginbaril it owa pa makilaeang persona.
Bangud kara, nag-angkon imaw it lastro sa tuo nga parte it eawas kung siin gilayon man rayang gindaea sa ospital apang binawiaan man it kabuhi samtang ginabueong.
Matapos ro pagpamaril hay madasig man nga nagpaeagiw ro owa pa matumod nga suspek.
Ginapahayag man it katrabaho it biktima nga nakibot eon lang sanda sa insidente kun siin nakita eon lang nanda nga duguan eon ro biktima samtang naga-eubog sa andang kusina.
Sa pihak nga parte, nagapadayun man ro imbestigasyon it Kalibo PNP sa nasambit nga insidente.
Suno kay Police Lieutenant Aubrey Ayon, Deputy Chief of Police it Kalibo Municipal Police Station nga may pilang person of interest eon sanda sa makaron kamana man nga ginatan-aw eon nanda ro previous record it biktima agud nga makabulig sa imbestigasyon.
Owa man kara ginbuoe ro posibilidad nga may koneksyon sa nakaalitan it biktima ro natabo nga krimen.
