KALIBO, Aklan—Namatay samtang ginabueong sa ospital ro sangka 42-anyos nga empleyada it Development Bank of the Philippines (DBP) matapos nga barilon it maeapitan samtang nagapungko sa sangka tricycle bandang alas-8:00 it agahon sa Sitio Looban, Barangay Camanci, Norte, Numancia, Aklan.
Base sa inisyal nga imbestigasyon it pulisya, nagapungko eamang sa service tricycle ro biktimang si Jonalyn Arcenio Maribojo, alyas Becha, 42, residente it nasambit nga lugar, samtang nagahueat it pagbalik it driver nga nag-agto sa baealigyaan it isda maeapit sa CBCP Multi-Purpose kat paeapitan it gina-alegar nga riding-in-tandem.
Ginasugid nga tatlong eupok it baril ro nabatian it mga residente sa lugar.
Matapos mahimo ro krimen, ginasugid nga nagpaeagiw ro mga suspek sakay it motorsiklo, kun sa siin hay nag-warning shot pa it daywang beses.
Gin-abandona it mga gunmen ro motorsiklo sa unahan ag gina-alegar nga nagsakay sa sangka van nga nagserbing get-away vehicle.
Suno sa tatay it biktima nga si John Arcenio nga blangko sa gihapon sanda makarun sa motibo it suspek sa pagpamaril bangud nga owa man sanda it nasayuran nga may nakaaway raya ukon nakabaton it paeag sa kabuhi.
Ginbulgar pa kara nga bueag eun ro biktima sa anang asawa nga si Jocel Maribojo bangud sa reklamo it pagpanakit ag ginbawaean man raya it mga otoridad nga makapaeapit sa anang pamilya ag daywang ka mga unga.
Sa makarun hay padayun pa nga gina-imbestigahan it mga awtoridad ro nasambit nga krimen para sa nagakaigo nga imbestigasyon.
