KALIBO, Aklan—Magapangatubang sa kasong pag-eabag sa Presidential Decree 1865 ukon Illegal Trading of Petroleum Products ro sangka eaeaki matapos nga illegal nga magbaligya it gasolina sa Brgy. Laserna, Nabas.
Nakilaea ro suspek nga si Allan Jadia, 45-anyos, residente it nasambit nga lugar.
Base sa report, nakabaton it impormasyon ro mga otoridad angot sa illegal nga pagbaligya it gasolina it suspek rason nga ginkasa ro entrapment operation.
Ginasugid nga nagpakunu-kunu ro daywang ka mga pulis nga magabakae it napueong litro it gasolina kabaylo it P600 nga mark money.
Kat mabaton eon sigon it suspek ro kwarta hay dikato eon nagpakilaea ro daywang pulis ag insigidang ginpangayuan it nagakaigo nga permit ro suspek.
Bangud sa owa it maipakitang permit hay insigida imaw nga gin-aresto.
Narekober sa lugar ro ap-at ka mga container nga puno it gasolina kamana man sambilog nga container nga may bawas ag 22 tanan ka mga boteng may sueod nga gasolina kun siin siyam ro mabahoe ag 13 ro maisot.
Ro nasambit nga suspek hay presenteng una eon sa kustodiya it Nabas PNP para sa nagakaigo nga disposisyon.
