NATIONAL News — Kapin sa an-um eon nga katawo ro napbalita nga namatay samtang daywang iba pa ro nagapabilin nga naduea matapos ro pagpanaeasa it Tropical Cyclone Ferdie nga may international name nga Bebinca ag nagbaskog nga Southwest Monsoon (Habagat).
Base sa pinakabag-ong situational report it National Disaster Risk Reduction and Management Council (NDRRMC), ap-at ro napabalita nga patay, nagapabilin nga “subject to validation,” halin sa Bangsamoro Autonomous Region in Muslim Mindanao (BARMM).
Daywa man ro napabalita halin sa Zamboanga Peninsula.
Angot man sa mga naduea nga indibidwal, ro kada sambilog hay halin sa Zamboanga Peninsula ag Western Visayas.
May una man nga 11 nga kaso it naninahan halin sa BARMM ag Soccsksargen.
May kabilugan nga 203,197 nga katawo ukon 47,166 pamilya sa 292 barangay ro apektado sa pagpanaeasa it maeain nga tiempo.
Sa nasambit nga numero, 13,825 ro nagapabilin sa sueod it evacuation centers, samtang 22,801 man ro mas gusto sa temporary shelters.
Bangud sa bagyong Ferdie ag Habagat, nagresulta raya sa P200,000 nga balor it kahalitan sa imprastraktura sa pilang lugar.
Nag-aywan man raya it pagkaguba it 12 nga baeay, ag partially damaged man ro 85 nga iba pa.
May una man nga 17 nga karsada ag tatlong tulay nga hasta sa makaron hay indi gihapon maagihan.
May napabalita man nga power interruptions ag pagka-delay it pilang byahe ag seaport trips sa pilang rehiyon.
May pilang eskwelahan man ro nagdesisyong suspendihon ro klase ag trabaho.
Samtang, ginpahayag it NDRRMC nga may kabilugan nga P3,976,377 balor it bulig ro gintau sa mga apektadong residente sa Bicol Region ag Western Visayas.
Ro bagyong Ferdie hay nagguwa eon sa Philippine Area of Responsibility (PAR), Sabado it hapon apang bangud sa ikog kara ag Southwest Monsoon kamana man ro pagsueod eon it bagyong Gener rason nga nagapadayun ro pag-inuean sa pilang parte it nasyon.
