KALIBO, Aklan—Duguan nga gindaea sa ospital ro sangka 75-anyos nga lolo matapos nga gin-einabo it dating naka-away sa Sitio Magupiña, Brgy. Magpag-ong, Batan, alas 11:00, agahon it Biyernes.
Padayun nga ginabueong sa Intensive Care Unit (ICU) it Aklan Provincial Hospital ro biktimang si Eliserio Dela Cruz bangud sa gin-angkon nga nina sa anang ueo, siko, ag iba pang parte it eawas samtang sa kustodiya eon it batan munuicipal police station ro naarestong suspek nga si Raffy Ruta, 48 anyos, parehong residente it nasambit nga lugar.
Base sa report, samtang nagapahaum it andang ilabas ro biktima ag ro anang asawa hay gulpi eamang nga nagsueod ro suspek sa andang baeay nga una sa impluwensiya it makahieilong nga ilimnon.
Gulpi eamang sigon nga gin-einabo it suspek ro biktima gamit ro sanduko.
Nakapangayo pa it tabang ro mag-asawa rason nga insigidang naagtunan it andang apo kun sa siin naaktuhan ro insidente ag naawat ro suspek.
Nagapati ro awtoridad nga bangud sa dating owa pagka-ilintindihan it daywa nga naka-abot sa andang barangay ro motibo sa krimen.
