Naga-abot sa waeong mga atleta sa athletics halin sa school district of Aklan ro kwalipikado para sa Palarong Pambansa nga pagahiwaton sa buean it Mayo sa Agusan del Sur.
Ro mga kwalipikadong atleta hay ro mga nakaangkon it gold ag silver medal sa bag-o eamang natapos nga Western Visayas Regional Athletics Association (WVRAA) meet sa Passi City .
Suno kay athletic coach Jovie Ote nga maskin ro mga silver medalist hay naeakip sa listahan matapos nga makapasa sa qualifying standard it Palarong Pambansa.
Lima sa secondary boys ag daywa sa secondary girls ro kwalipikado kamana man nga sambilog sa elementary boys .
Gindeklarang second runner-up ro SDO-Aklan matapos nga makabo-oe it kabilugan nga 51 gold, 65 silver ag 116 bronze medals sa nagkaeain-eain nga kategorya it WVRAA 2026.
Samtang, nagapati si coach Ote nga kumpara sa nakasanayan nga per province ko nagtaliwan nga mga dinag-on, mas hugut ro kompetisyon makaron nga kada school district ro delegasyon.
Pagkatapos it mga aktibidad sa graduation ag recognition day, magapaidaeum sigon ro andang mga atleta sa mas hugut nga training bilang pagpahaum sa 2026 Palarong Pambansa.
Target sigon it region 6 nga ma-maintain ukon mas mapasaka ro andang third rank ko nagtaliwan nga 2025 Palaro.
Raya ro unang kahigayunan para sa Western Visayas nga maghampang nga bukon it kaibahan ro Negros Occidental nga kaparte eon makaron it contingent it Negros Island Region.
Madumduman nga sambilog sa humakot it medalyang atleta makaron nga WVRAA hay si Nuchi Veronica, kun sa siin pagadepensahan kara ro anang titulo sa 100-meter freestyle sa swimming.
