KALIBO, Aklan—Patay ro sangka 81-anyos nga lola matapos nga masunggaban it sangka motorista samtang nagapanikangon ko gabi-i it Lunes sa Brgy. Gibon, Nabas.
Ginkilaea ni Police Corporal Ronald Decatoria it Nabas Municipal Police Station ro biktima nga si Leonora Antonio, residente it nasambit nga lugar samtang ro suspek hay nakilaea kay Hernan Antolin Oczon, 52-anyos, residente it Brgy. Nabaoy, Malay ag may angkas nga sangka menor-de-edad.
Ginasugid nga nagapauli eon kunta ro suspek kat aksidente kara nga masunggaban ro biktima.
Nasayuran nga may kadueomon ro headlight it ginamanehong motorsiklo ni Oczon kamana man nga una imaw sa idaeom it impluwensya it makahieilong nga ilimnon rason nga owa kara mapan-uhan ro nagapanikangon nga senior citizen.
Gilayon pa nga gindaea sa Ibajay District Hospital ro biktima apang sa owa magbuhay hay deklara man nga patay it nagtatap nga doktor.
Sa pihak kara, insigida man nga napahilway si Oczon matapos nga magpirma ro pamilya Antonio it affidavit nga indi eon magpasaka it nagakaigo nga kaso.
