KALIBO, Aklan — Magiging daeayon ro pagahimuong rehabilitasyon sa isla it Boracay matapos nga ideklara ni Pangueong Rodrigo Duterte ro total closure sa isla umpisa sa Abril 26.
Ginpahayag ni Executive Assistant to the Mayor Rowen Aguirre it LGU-Malay, magiging full swing eon ro pagahimuong pagpaeapad sa karsada ag construction, maging ro pagbak-eas sa mga iligal nga istraktura sa wetlands ag forestlands, pagdugang ag pagsa-ayos it sewerage ag sewer lines, pagbutang it mga tubo, pag-install it mga solid waste management facilities ag nagakadapat nga transportasyon sa isla.
Sa pihak nga parte, pagabuligan man it LGU-Malay ro mga maapektuhang trabahador ag residente agud mabawasan ro impact it pagpasara sa isla.
Nagpromisa man ro Department of Labor and Employment (DOLE) nga magata-o it trabaho ag pinansiyal nga bulig sa haeos 30,000 nga naka-rehistro ag informal workers.
Suno pa kay Aguirre, ginhimo eon sigon nanda ro tanan it andang masarangan kaibahan ro mga stakeholders agud maipaabot kay Duterte ro planong “yes to clean-up, no to closure”, apang nagpaguwa eon sigon it desisyon ro pangueo sa ginpatigayong Cabinet meeting kahapon.
Bawae eon nga makasueod sa isla umpisa sa Abril 26 hasta it Setyembre ro mga turista ag mismong mga residente eamang nga nagaabot sa 50,000 ro pagapasugtang makatabok.
