KALIBO, Aklan — Ginaeauman eon it Civil Aviation Authority of the Philippines (CAAP)-Aklan ro pagnaba sa numero it mga domestic ag international flights nga nagahugpa sa Kalibo International Airport.
Raya hay kasunod sa deklarasyon ni Pangueong Rodrigo Duterte nga total closure sa isla it Boracay umpisa sa Abril 26 sa sueod it an-om nga buean.
Sa interview it Bombo Radyo Kalibo, ginpahayag ni CAAP-Aklan manager Efren Nagrama nga kaabuan sa mga pasaherong sakay it domestic ag international flights sa paeoparan hay puro mga bakasyunista sa Boracay.
Nakikita eon sigon nanda ro mabahoe nga paghina sa operasyon it airport bangud sa nabaton nga abiso may kaangtanan sa kanselasyon it biyahe it mga airline companies umpisa sa ulihing dominggo it Abril hasta it Oktubre.
Ginpahayag dugang ni Nagrama nga magapadayon gihapon ro serbisyo it pilang airline companies paadto sa Kalibo ag Caticlan airport, apang pagabawasan ro andang biyahe ag iga-divert sa ibang mga probinsiya sa nasambitang mga petsa agud masiguro ro domestic tourism.
Nasayuran nga ro Kalibo airport hay nagabaton it kapin sa 34 nga international flights kada adlaw ag 11 ro domestic flight.
