KALIBO, Aklan — Sa nagahilapit nga pagbukas ku bantog nga Isla it Boracay sa Oktubre, ginhambae ni Executive Assistant for Boracay Affairs it LGU-Malay Rowen Aguirre nga blangko pa sanda sa carrying capacity it isla.
Sa ngayon makaron sigon hay owa pa it abiso ro inter-agency task force angot sa mga sukatan kung pilang turista ro pagatugutan nga makasueod sa Boracay.
Samtang, ginpahayag pa ni Aguirre nga owa it makapugong sa mga establishment owners kung pagustuhon nanda nga mala-fiesta ro pagsug-aeaw sa mga turista sa reopening it Boracay bangod sa kalipay nga nababatyagan.
Raya hay kabaliskaran sa pahayag ni Tourism Secretary Bernadette Puyat nga simpleng pagbukas eamang it tourist destination ro andang gina preparahan.
Sa pihak nga parte, ginpabutyag ni Aguirre nga may pilang resorts ag hotels ro nagabaton eon it bookings para sa Boracay reopening.
Mag-eowas kara, nagabaligya eon man sigon ro pilang airline company it ticket sa uman man nga pagbalik it andang regular flight schedules sa Caticlan airport ag Kalibo International Airport.
