KALIBO, Aklan — Kadungan ko pagbukas it bag-ong Boracay, may ginpresentar nga security system ag peace and order program ro Philippine National Police (PNP) kontra sa mga krimen nga masaming nagakatabo bisan kat uwa pa ginpaidaeom sa an-om nga bueang rehabilitasyon ro isla.
Sa sangka press conference sa Boracay, ginpahayag ni PNP Chief Director General Oscar Albayalde nga pila sa mga tikang nga andang ginhimo hay ro pag-restructure sa Malay Police Station, kon siin igasaylo raya halin sa mainland Malay paadto it Boracay.
Gindugangan man sigon ro andang mga personnel nga halin sa 147 hay nag-abot eon sa 413.
Makaangkon raya it limang sub-stations nga igabutang sa tatlong barangay it Boracay nga ginakaeakipan it Balabag, Manocmanoc ag Yapak kamana man sa Caticlan ag Poblacion Malay nga may bastanteng kagamitan para sa kaeogtaan ag kaeawran.
Gin-insister pa ni Albayalde nga katuyuan it reorganization sa Malay Police Station nga matutukan ro pagpatuman it mga laye kapin eon ro pagpilak it basura ag security operations.
Bangud kara, ginbuwag eon ro Boracay Tourist Assistance Center (BTAC).
Sa baylo sigon nga tourist police unit, ginaduso nanda ro world class, highly-capable nga tourist ag environment-oriented nga police force.
