KALIBO, Aklan — Kabilugan nga waeong pagbuno ro naangkon it caretaker it sangka resort sa Sitio Bolabog, Brgy. Balabag sa isla it Boracay nga nagresulta sa anang hinali nga kamatayon.
Raya hay base sa autopsy report nga ginpatigayon ag ginpaguwa ni Dr. Joe Martin Fuentes, Medico Legal officer it Regional Crime Laboratory.
Suno kana, multiple stab wounds ro ginkamatay it biktimang si Dionelo Flores, 54-anyos ag residente it Brgy. Tayhawan, Lezo matapos nga nasapwan eon lang raya sa sueod it kwarto nga nagapaligos sa kaugalingon nga dugo ag uwa eon it kabuhi.
Ginpahayag dugang nga tatlo sa likod ag lima sa prente nga umabot pa sa anang tagipusuon ro kabilugan nga igo nga naangkon it biktima gamit sigon ro 12.5 inches nga kutsilyo.
Mag-eowas kara, nakit-an dugang sa otopsiya nga nawasak ro baliw-baliw it ilong ni Flores nga senyales sigon nga gin-eampusan raya it matig-a nga bagay kamana man may marka ro liog nga posibleng gin-eu-ok antes nga ginbuno.
Nasayuran nga kapin sa 30 anyos eon nga nagatrabaho sa nasambit nga resort si Flores.
Sa pihak nga parte, kumbinsido ro pamilya ni Flores nga bukon eamang it sambilog ro naghimo it krimen ag nagapaninggitan ro mga raya it hustisya para sa biktima.
Ro insidente hay padayon pa nga gina-imbestigahan it Malay PNP para matumod ro pagkatawo it suspek nga nakit-an sa CCTV footage sa oras it krimen.
