KALIBO, Aklan — Nag-apela si Metro Kalibo Water District General Manager Atty. Edmund Peralta nga habaan pa ro pasensiya it andang mga miyembro-konsumidor bangud nga may mga tikang eon sanda nga ginahimo agud nga makaangkon it maayos ag bastante nga supply it tubi.
Sa kamatuoran suno kana hay mayad eon ro andang serbisyo makaron kumpara ko nagtaliwan nga mga dinag-on .
Ginpahayag dugang nga nagapadayun ro andang pag-komponi ag pag-ayos it mga linya nga samad.
Posible suno kana nga sa sueod it sang dag-on hay makompleto eon ro pagbutang it mga tubo eabi eon ro mga mabahoe nga tubo.
Ginaeauman pa nga sa oras nga maga-operate eon ro bulk water hay makasabat eon raya sa demand it tubi .
Apang ro nasambit nga operasyon suno kana hay owa it katapusan eabi pa ag naga-inabu man ro numero it andang mga konsumidor partikular makaron nga tiempo nga maabu ro mga ginpatindog nga mga housing units .
Aminado man si GM Peralta nga may mga kahigayunan nga mahina ro supply it tubi bangud sa mga ginapatigayon nga flushing agud nga malikawan ro mga maeubog nga tubi nga nagatubod sa gripo.
Samtang, nagapadayun man sigon ro andang pag-repair sa mga may diperensiya nga linya agud nga makaangkon it maayos nga supply it tubi sa banwa it Balete.
Sa pihak nga parte, gindugang pa kara nga nagapatuman sanda it penalty agud nga ma-obliga ro mga member-consumer nga magbayad sa tamang oras, kun sa siin, may ginasunod sanda kara nga scheme .
Owa man sigon it eauman nga pag-taas sa panueoktan sa tubi.
Ro andang “water rate” sigon hay owa it pagbag-o sa sueod it 15 anyos .
