KALIBO, Aklan—Mas nagtaas pa ro kaso it online scam sa bilog nga Western Visayas sa tunga it ginapangatubang nga krisis bangud sa coronavirus disease ukon covid-19.
Suno kay Patrolman Emerito Frutas Jr. it Pnp Regional Anti-Crime Unit nga raya hay bangud sa ginapatuman nga community quarantine sa mga lugar kung sa siin haeos kaabuan sa mga pomoeuyo hay nagatutok sa andang mga gadgets.
Adlaw-adlaw man sigon hay nagapaiba-iba ro modus it mga suspek apang ro permi nga ginareklamo it mga biktima hay ro nagapanggap nga online selller.
Una sigon nga ginahingyo it mga raya nga magpadaea anay it kwarta antes nga ihatod ro item apang kung na-send eun hay gilayon rayang nagapang-block.
Angot kara, ginsuhestiyon ni Frutas nga dapat Cash on delivery eun lang ro mga transaksiyon para macheck ro item antes nga magtao it kwarta.
Sa makarun hay nakikipag-angot eun sigon sanda sa Department of Justice (DOJ) , National Privacy Commission (NPC) , National Bureau of Investigation (NBI) ag sa facebook para sa nagakaigo nga solusyon angot sa mga modus nga naga-eapta makarun sa online kaibahan eun ro “Identity Thief”.
