KALIBO, Aklan—Nakataeana nga ipaidaeom sa swab test ro 20 ka mga indibidwal nga direktang nakasalamuha it sangka OFW maghalin sa Libertad, Antique nga nagtambong sa sangka family gathering sa bahin it Brgy. Linabuan Sur, Banga nga ko ulihi hay nasayuran nga nagpositibo sa Coronavirus Disease ukon COVID-19.
Suno kay Ma. Donnalyn Siyambio, Police Information Officer it Banga Inter-Agency Task Foce on COVID-19, nagpatigayun sigon sanda it contact tracing ko adlaw it Sabado, Agosto 1 para usuyon ro tanan nga nakasalamuha it nasambitang OFW.
Prayoridad sigon nanda nga mausoy tanan nga anang naka-direct contact sa lugar.
Suno kay Siyambio nga nagapabilin nga asymptomatic ukon owa nagapakita it anumang sintromas it makataeapon nga sakit ro nasambit nga OFW.
Ginpahayag dugang nga gin-lockdown eon man it mga health official ro compound kung siin ginpatigayun ro pagtililipon.
Samtang, sa pihak nga parte, gin-engganyo man ni Siyambio ro tanan nga mga nagtambong sa nasambitang family gathering sa Linabuan Sur, Banga nga kung mahimo hay makipag-angot sa andang taeatapan ukon mag-self quarantine lang anay.
Eabi eon ro mga indibidwal nga nag-atendir nga owa pa nanda maabot hasta nga owa pa nagaguwa ro resulta it ginpatigayun nga swab test.
