KALIBO, Aklan—Mas pang nag-init ro kampanya sa tunga ni US president Donald Trump ag democratic nominee Joe Biden pilang oras antes ro eleksyon sa Estados Unidos.
Suno kay Bombo International Correspondent Dr. Gabriel Ortigoza, sangka manugturo sa Sacramento, California nga ginpuntirya it daywa ro mga ginakabig nga swing states ukon mga estado nga owa pa it kasiguraduhan kon sin-o nga partido ro ginasuportahan.
Raya hay ginaeakipan it Pennsylvania, North Carolina, Florida, Wisconsin, Arizona ag maskin ro Texas.
Sa makaron sigon hay mas liyamado si dating US vice president Biden sa mga pinaka-ulihi nga surveys.
Apang close fight sanda ni Trump sa mga nagapangunang estado rason nga indi pa ma-predict kon sin-o ro magapangibabaw.
Kabulig ni Biden sa kampanya ro anang asawa, bise presidente nga si Kamala Harris ag kaalyadong si dating president barack Obama.
Samtang, kabulig ni Trump ro anang bise presidente nga si Mike Pence.
Gindugang pa ni Dr. Ortigoza nga masobra sa 100 million eon nga katawo ro nakaboto pinaagi sa early voting, kun sa siin makabig nga mataas makaron ro turnout sa nagtaliwan nga century.
Ro eleksyon makaron sa US hay nakasentro sigon sa andang pakikipag-away sa COVID-19 pandemic, nagkaeain-eain nga policy platforms eabi eon sa ekonomiya ag immigration ag ro posibleng pagka-atrasar ukon kwestiyunableng resulta it bueutohan.
Nasayuran nga nauna eon nga nagpahayag it pagduda si Trump nga ro mail-in ballots hay magaresulta it dayaan rason nga nagpaandam nga maskin mapierde hay igadeklara nana ro anang kaugalingon nga nagdaog.
Owa man sigon it epekto ro isyu nga puppet it china si Biden bangud sa pagbaha it mga campaign fund nga ginatau it mga tawo ukon grupo it mga amerikano.
