KALIBO, Aklan—Arestado ro sangka soltero nga ginaturong responsible sa pagpanakaw sa sangka panimaeay sa East Town Homes ko gabi-i it Martes sa Brgy. Laguinbanwa East, Numancia.
Nakilaea ro suspek nga si James Carl Rapiz, 19-anyos ag residente it Brgy. Bubog sa nasambit nga banwa.
Base sa report, natigayun nga mabuoe it suspek ro sangka coin purse nga may sueod nga kapin sa 50 pesos nga kwarta kung sa siin naitsurahan raya it tag-ana it baeay.
Bangud kara, nagkasa it follow up investigation ro Numancia PNP kahapon ag gin-adtunan sa andang baeay si Rapiz.
Sa pag-body search it mga otoridad nabuoe nanda ro daywang ka mga sachet it ginapatihan nga shabu sa tuo nga porsyon it buesa it suspek.
Nasayuran nga naeakip eon sa sangka shooting incident si Rapiz ko nagtaliwan nga Nobyembre 2020 sa banwa it Numancia apang nahimo karang makapyansa.
Sa pihak nga parte, hugut man ro pagpamalibad it suspek ag ginpamilit pa karang planted ro narekober nga shabu sa anang posisyon.
Sa makaron hay nagapadayun pa ro imbestigasyon it pulisya sa nasambitang insidente.
