KALIBO, Aklan—Pormal nga ginturn-over it Libacao Municipal Police Station sa lokal nga gobyerno sa pagpanguna ni Mayor Charito Navarrosa ro nagsurender kanda nga gina-alegar nga miyembro it New People’s Army ukon NPA.
Suno kay P/Major Jose Marlon Murallo, hepe it Libacao PNP nga unang nagdangop ro eaeaki kay Barangay Captain Esmeraldo Moya.
Ro hitabu hay insigida nanda nga ginpahisayod sa 12th Infantry Batallion, Philippine Army ag Aklan Police Provincial Office.
Ginpahayag sigon it surrenderer nga tumandok it Brgy. Dalagsaan nga nagdesisyon imaw nga magbalik sa sabak it gobyerno bangud sa kalisod, gutom ag kawad-an it kasiguraduhan nga mataw-an it katumanan ro ginpromisa kana nga bulig ag suporta it andang hubeag.
Ginasugid nga haeos limang buean pa eamang raya nga miyembro it NPA.
Owa sigon raya it ginsurender nga armas ag iba pang gamit sa pagkabaeaka nga maging mitsa pa it anang kabuhi ro pagbitbit it baril sa pagpanaog halin sa bukid.
Nakataeanang igapaidaeumn sa debriefing ro eaeaki ag maga-agi man sa Enhanced Comprehensive Local Integration Program sa maayos nga uman nga pagbalik sa komunidad kaibahan ro anang pamilya agud nga makapangabuhi it normal.
Pinaagi man sa nasambit nga programa hay pagataw-an raya it nagakaigo nga bulig it gobyerno agud nga makaangkon it pangabuhian.
Gindugang pa ni Murallo nga raya ro kauna-unahan nga kahigayunan nga may nagsurender nga NPA halin sa nasambit nga banwa.
