KALIBO, Aklan—Arestado it mga otoridad ro sangka eaeaki nga nagapangatubang sa kasong attempted homicide matapos nga matiempuhan raya kahapon sa andang baeay sa San Jose, Romblon.
Nakilaea ro akusado nga si Renante Gabinete, 39 anyos ag residente it Brgy. Lindero, San Jose, Romblon.
Ro operasyon hay ginkasa it gintingob nga pwersa it Malay Municipal Police Station, CIDG Intelligence Division ag Aklan Maritime Police.
Sa gahum it warrant of arrest nga ginpaguwa ni Judge Cleo Marie C. Santillan it fifth Municipal Circuit Trial Court Sixth Judicial Region Buruanga –Malay nga may petsang Oktubre 12, 2020, owa eon nahimo pa nga makasukoe ro nasambit nga akusado sa mga otoridad kat imaw hay arestuhon ag ginposasan.
Kapin sa 36,000 pesos ro gintaeana nga piyansa it korte para sa anang temporaryong kahilwayan.
Presenteng nakaditene sa Malay PNP ro akusado ag nakataeanang iga-turn-over sa korte nga natungdan para sa nagakaigo nga disposisyon.
