KALIBO, Aklan—Ginpasakaan eon it kasong homicide si James Benigno, 43-anyos residente it Brgy. Tondog, Tangalan matapos nga anang gin-eabo patay ro kaugalingong tiyo nga si Melchor Tapispisan, sa legal nga edad ag parehong residente it nasambit nga lugar.
Nauna eon nga dead on the spot si Tapispisan matapos nga gin-eabo sa leog ni Benigno tuga it mainitan nga diskusyon kamana man dating banggianay sa magtimbang nga parte.
Matapos ro insidente hay nagpaeagyo si Benigno apang gilayon man nga nagsurender sa Altavas Police Station nga insigida man nga ginrefer sa natungdan nga taeatapan it pulisya para sa nagakaigong disposisyon.
Suno sa pulisya, homicide eamang ro ginpasaka nga kaso bangud nga depensa it suspek, gin-unahan imaw it hana nga pag-eabo it anang tiyo rason nga insigida man imaw nga naggabot it talibong ag gin-eantas ro leog it biktima.
