KALIBO, Aklan—Magapangatubang sa kasong pag-eabag sa Presidential Decree 449 ukon Cockfighting Law ro daywang ka mga kaeaeakin-an matapos nga nadakpan sa pagpatigayon it bueo-bueo sa Brgy. Calangcang, Makato.
Ginkilaea it pulisya ro nadakpan nga sanday Jonel Sanglitan, 34-anyos it Brgy. Dongon East, Numancia ag Raffy Vargas, 29-anyos it Brgy. Cogon, Lezo.
Suno sa mga otoridad, nakabaton sanda it impormasyon nga may nagakatabong bueo-bueo sa nasambit nga lugar rason nga insigida sandang nagpatigayon it operasyon ag madinaeag-on nga nadakpan ro daywa samtang nakapaeagyo ro iba pa.
Narekober kanda ro daywang ka mga pambueang nga manok nga ginaeakipan it sangka buhi ag patay nga manok kamana man P450 pesos nga kwarta nga ginamit bilang taya.
Ro daywa hay temporaryong ginkulong sa nasambit nga taeatapan it pulisya para sa nagakaigong disposisyon.
