KALIBO, Aklan—Padayon nga naka-confine sa intensive care unit it sangka pribadong hospital sa banwa it Kalibo ro sangka tricycle driver matapos nga hinapit it L300 van sa national highway nga sakop it Brgy. Marianos, Numancia.
Ginkilaea ni PMSgt. Jhon Cris Nalangan it Numancia PNP ro driver nga si Nolie Ureta, 37-anyos it Brgy. Bulwang, Numancia sakay ro pasahero kara nga si Bernadette Nicodemus, 57-anyos ag residente man it nasambit nga lugar.
Base sa imbestigasyon it pulisya, nagasunod ro daywang ka behikulo halin sa Kalibo paadto it Numancia kat pag-abot sa nasambit nga lugar hay nagliko sa waea nga porsyon ro tricycle agud nga magpagasolina apang bangud sa kadasigon it daeagan it Van nga ginamaneho ni Romeo Paghonasan, 52-anyos it Brgy. Bacan, Banga rason nga uwa kara nalikawan ro tricycle ag bumaliskad gid it makapilang beses.
Bangud sa impact hay nakaangkon it kasakitan ag lastro sa kaeawasan ro daywa rason nga insigida man nga gindaea sa ospital para sa nagakaigong pagbueong.
Samtang, si Ureta hay gilayon man nga ginrefer sa pribado nga ospital para sa anang nagakaigong medikasyon.
