KALIBO, Aklan—Balik operasyon eon ro taeatapan it Aklan Electric Cooperative (Akelco) main office sa banwa it Lezo matapos ro masobra sang dominggo nga pagpaidaeom sa lockdown.
Suno kay Engr. Alexis Regalado, General Manager it Akelco nga balik eon sa normal nga transaksyon ro tanan nga opisina sa sueod it taeatapan umpisa makaron nga adlaw it Lunes, Marso 8 apang nagtaeana anay it skeletal force bangud ro iba pang empleyado hay padayun nga naka-quarantine.
Kapin sa 36 nga mga empleyado pa eamang sigon ro naka-report sa andang opisina.
Suno kay Engr. Regalado nga masobra 120 nga mga empleyado ro ginpaidaeom sa swab test matapos nga magpositibo sa Coronavirus Disease ro sambilog nanda nga engineer nga ko ulihi hay namatay.
Sa nasambit nga numero hay 12 sigon ro nagguwa nga positibo sa deadly virus.
Sa makaron hay ginahueat pa nanda ro mga medical certificate it pilang empleyado nga nag-negatibo sa virus.
Ginpaathag man kara nga ginpatag-uran ro andang oras it operasyon.
Bukas suno kana ro andang opisina umpisa alas-8 it agahon hasta alas-4 it hapon kung siin hasta eamang it alas-3:30 it hapon sanda magabaton it mga nagabayad it bill sa kuryente.
