KALIBO, Aklan—Nakaangkon it nagkaeain-eain nga lastro sa kaeawasan ro sangka eaeaki matapos nga gin-eabo it menor de edad sa Brgy. Cabugao, Altavas.
Ginkilaea ro biktima nga si Roberto Gregorio, 28-anyos samtang ro ginaturo nga suspek hay sangka 15-anyos nga binatilyo.
Ginasugid nga bisita si Gregorio sa birthday party it biktima kon sa siin nag-inuman ro mga raya.
Ginasugid nga kat una eon ro mga raya sa idaeom ko impluwensya it aeak hay may nagpatunga nga mainitan nga diskusyon nga nagresulta sa nasambit nga insidente.
Samtang, depensa it suspek, nag-uli sigon ro biktima ag sa anang pagbalik hay may daea raya nga hinangiban ag nagpang-ayat it inaway rason nga naeab-an raya it mismong nagaselebrar sa anang kaadlawan.
Si Gregorio hay unang gindaea sa Altavas district hospital apang ko ulihi hay ginrefer man sa Aklan provincial hospital kon sa siin imaw sa makaron naka-confine para sa anang nagakaigong pagbueong.
Samtang, ro nasambit nga binatilyo hay ginrefer sa Department of Social Welfare and Development ukon DSWD para sa nagakaigong disposisyon.
