KALIBO, Aklan–Ginpatag-od eon ro curfew sa banwa it kalibo umpisa alas-10:00 it gabi-i hasta alas-4:00 it aga-aga umpisa makaron nga adlaw it lunes, abril 5, 2021.
Raya ro ginpahayag ni Major Belshazzar Villanoche, hepe it Kalibo Police Station.
Suno kana nga nagpaguwa si Kalibo mayor Emerson Lachica it executive order no. 024 bilang padayun nga pagdahan kontra sa Coronavirus Disease 2019 ukon COVID-19.
Nasayuran nga ro aklan hay nakapaidaeum makaron sa modified general community quarantine ukon MGCQ.
Base sa ordinansa, tuyo kara nga mataw-an it kahigayunan ro mga establisimento komersiyal nga mapaeawig ro andang operasyon agud nga mapabaskog ro ekonomiya it banwa.
Ko Marso 26, 2021 sa pueong it municipal inter-agency task force , gin-aprubahan ro andang resolution no. 008 nga naga-endorso kay mayor lachica ag sa sangguning bayan sa pag-amyenda sa ordinance no. 2020-004 ukon pagpatuman it curfew hour.
Exempted sa mandu ro pilang indibidwal ag iba pang health and emergency cases.
Angot kara, padayun nga nagapanawagan si major villanoche sa publiko nga padayun nga magsunod sa health protocol sa atubang it padayun nga paeag it deadly virus.
Nagpaandam pa raya nga magapangatubang sa nagakaigo nga penalidad ro sin-o man nga maga-eabag sa curfew hour.
