KALIBO, Aklan—Sigidas ro pagpatigayun it operasyon it Aklan Maritime Group sa mga kaeawuran nga sakop it probinsya it Aklan.
Suno kay Police Corporal Rocelyn Suela, Public Information Officer it Aklan Maritime Group nga ko Abril 8 samtang nagapatigayun sanda it seaborn operation sa kaeawuran nga sakop it banwang New Washington hay nakadakop sanda it kapin sa lima ka mga bangka nga nagapatigayun it illegal fishing.
Kaibahan sigon nanda sa operasyon ro mga miyembro it New Washington PNP ag Bureau of Fisheries and Aquactic Resources (BFAR).
Ro mga violator suno kana hay puro residente it nasambit nga banwa kamana man nga owa it permit halin s BFAR ag lokal nga gobyerno.
Ro mga natungdan nga persona hay ginpasakaan it kasong pag-eabag sa Republic Act 10654 ukon Unauthorize Fishing.
Ko Abril 14 nakadakop man ro taeatapan it dugang nga limang ka mga bangka nga illegal nga nagapangisda sa kaeawuran nga sakop it banwang Malay.
Ro mga crew ag kapitan sigon it mga natungdan nga bangka hay mga residete it Cebu ag Masbate.
Ginasugid nga haeos sang dominggo eon nga illegal nga nagapangisda sa lugar ro mga nasambit nga persona.
Ro mga violator hay ginpasakan eon it kaso pinaagi sa regular filing.
Ginpahayag dugang nga ro pyansa sa mga nasambit nga indibidwla hay magadepende sa andang gindawi nga isda.
