KALIBO, Aklan—Nag-abot eon sa 122 ro gintukod nga barangayanihan ukon kaugalingon nga bersyon it community pantry it Philippine National Police ukon PNP sa bilog nga Western Visayas.
Suno kay PLTCOL Joem Malong, tagapaghambae it Police Regional Office 6 nga antes pa man nagsoeputan ro mga community pantries sa nagkaeain-eain nga parte it nasyon hay nauna eon sanda nga nagtukod ko nagtaliwan nga dag-on it bayanihan kiosk.
Nagkaeain-eain sigon ro andang ginpatigayon nga barangayanihan nga ginaeakipan it mobile ukon personal nga gina-agtunan ro mga barangay nga eubus nga nagakinahangean ukon gina-repack ro mga ginapanupod nga food packs agud nga maging madasig ro pagpila it mga pumueuyu nga apektado it pandemya.
Kaibahan man sa programa ro gift giving program ag feeding program.
Kaeabanan suno kana nga ginatau hay ro mga bugas, canned goods, noodles, itlog, asukar, kape, prutas, ag tinuea.
Samtang padayun sigon ro pag abot it bulig halin sa komunidad hay magapadayun man ro andang barangayanihan.
Gindugang pa ni Malong nga ro aktibidad hay kaparte it “Kapwa ko, Sagip ko” kun sa siin, mag eowas sa andang pondo hay nagabayanihan man ro mga pulis ag iba pang mga good Samaritan sa komunidad agud nga magtau it bulig.
Tuyo sigon nanda nga mapabuhay pa ro proyekto eabi pa kon maabu ro magapahayag it intensyong magbulig sa proyekto.
