KALIBO, Aklan—Nagapabilin nga naka lockdown ro Police Community Precinct ukon PCP 4 sa barangay Caticlan sa banwa it Malay.
Raya ro ginkumpirma ni P/Lt. Col. Don Dicksie de Dios, hepe it Malay Municipal Police Station.
Suno kana nga sambilog sa andang empleyado ro nag-uli sa Iloilo nga nag asikaso it pila sa anang mga dokumento sa police regional office ukon PRO-6 ro naka angkon it close contact sa anang misis nga empleyado man it nasambit nga headquarters nga nagpositibo sa COVID-19.
Matapos mabaton ro impormasyon, ginpahayag ni Lt. Col. de Dios nga insigidang gin abisuhan ro pulis nga mag isolate.
Ko Domingo nga adlaw, ginpaidaeum sa swab test ro 43 nana nga mga kaibahan ag sa ginpaguwa nga resulta ko lunes, waeo ro nag positibo sa deadly virus.
Samtang, ro mga nag negatibo hay ginmanduan gihapon nga tapuson ro 14 days nga quarantine bilang pagsunod sa protocol it Department of Health.
Gindugang pa ni de dios nga ro nasambit nga tikang hay bilang precautionary measure bangud nga kaabuan sa anang mga tawuhan hay puro mga frontliners.
Umpisa ko adlaw it Domingo, Mayo 9, gin-lockdown ro nasambit nga police station agud nga mataw-an it daean ro disinfection ag contact tracing.
Indi pa matumod kon hin-uno magabalik sa normal nga transaksyon ro nasambit nga police station.
Angot kara, gin abisuhan ro mga kliyente nga idtu anay makipag transaksyon sa anuman nga kinahangean nga police assistance sa andang sub-station sa barangay Poblacion sa banwa it Malay.
