KALIBO, Aklan—Nag-abot eon sa 79 ro numero it mga tinamaan it COVID-19 sa banwa it Libacao umpisa nga magtuhaw ro pandemya.
Suno kay Dr. Aldrinne Fernadez it Municipal Health Office ukon MHO-Libacao nga pang siyam sanda makaron sa mga banwa nga may nailistang pinakamataas nga kaso.
Sa nasambit nga numero, 34 ro aktibong kaso matapos nga madugangan it sambilog base sa record it provincial epidemiology surveillance unit hasta ko Mayo 21, 2021.
Kapin sa 21 ro naka facility quarantine, 4 ro admitted ag 4 man ro naka home quarantine.
Ginsaysay ni Dr. Fernandez nga ro bag-ong confirmed case hay high risk contact it sangka covid patient rason nga gin-swab test apang negatibo ro anang resulta.
Samtang, nagapatigayon it mandatory home quarantine, nakitaan raya it sintomas ag sa uman nga pagpaidaeum sa RT-PCR test hay nagpositibo raya.
Naalarma man sigon ro pasyente bangud nga first time kara nga naka experiensiya it kakaibang ubo, pagsakit it anang likod ag kabudlay sa pagginhawa.
Sa pihak kara, owa eon man sanda it ginahueat nga RT PCR test results bangud nga natapos eon ro andang contact tracing ag ginaeauman nga magadere-deretso eon ro uman nga pagdeklara sa banwa nga covid free .
Ro Libacao hay may total recoveries nga 49.
Nagapati si Dr. Fernandez nga bangud sa owa pagseryoso sa mga ginapatuman nga health and safety protocols partikular ro pagpatuman it mass gathering rason nga uman nga nagtaas ro andang kaso.
Sa pihak nga parte, ginkalipay man ni Dr. Fernandez ro mataas nga turn-out it mga senior citizens nga nagpasakop sa andang vaccination roll out para sa A2 group.
Angot kara, padayun ro anang pag apela sa iba pa kaibahan ro pilang naeakip sa A1 frontliners nga magpalista eon agud nga mataw-an it slot sa mga pagabakunahan.
