KALIBO, Aklan—Padayun nga gina-engganyo it 2nd Aklan Police Mobile Force Company (PMFC) ro publiko nga makiparte sa andang programang “Armas islan bugas”.
Ginpahayag ni Police Major Donel Regis, Force Commander it 2nd Aklan PMFC nga ro nasambit nga programa hay joint project it andang taeatapan ag Provincial Advisory Council.
Na-endorso eon man sigon nanda raya sa tagsa ka mga lokal nga gobyerno kun siin nagpromisa man ro mga raya nga pagasuportahan ro programa.
Ro mga indibidwal suno kana nga maga-surrender it andang ginapanag-iyahan nga armas nga owa it nagakaigo nga dokumento hay pagabayluhan it sangka sako nga bugas.
Ginpasiguro man kara nga indi nanda pagkasuhan ro mga natungdan nga indibidwal.
Dugang pa ni Major Regis nga raya hay sangka insiyatibo para suportahan ro Oplan Tokhang Kontra Armas Luthang (TKAL).
Ginlunsar sigon ro programa ko buean it Setyembre 2020 kun siin kapin sa 32 eon ka mga armas ag daywang explosives ro napasaalima it mga otoridad.
Ro mga gin-surrender nga armas hay iga-proseso sa PNP Crime Laboratory para sa proper documentation ag profiling.
