KALIBO, Aklan—Ginkumpirma it National Police Commission (Napolcom) Regional Office 6 nga owa pa sanda nakabaton it pormal nga reklamo halin kay Patrolman Rommel Magsusi kontra sa limang mga kabaro nga gina alegar nga nagbugbog kana ukon nagpatigayon it hazing nga owa it anuman nga rason.
Sa interview it Bombo Radyo, ginpahayag ni Napolcom Regional Director Atty. Joseph Celis nga indi sanda makaderetso sa pagpatigayon it pormal nga imbestigasyon kon owa it reklamo ag mga ebidensiya nga igasumite ro tagreklamo.
Kinahangean sigon nga makapresentar imaw it complaint affidavit, affidavit of witnesses, medical certificate ag iba pang documentary evidence.
Madumduman nga ko nagtaliwan nga Mayo 18 hay nag-atubang kay Atty. Celis ro mga gina akusahan it anti-hazing nga sanday Patrolman Ritchel Tolentino, Police Corporal Richie Lustica, Patrolman Christian Solanoy, Police Corporal Roque Lurca ag Patrolman Ruel Cuales para sa inisyal nga imbestigasyon.
Kasunod raya it personal nga pagdangop ni Magsusi sa andang taeatapan.
Ginasugid nga tradisyon eon ro “reception rites” sa mga bagitong police officers nga nagasueod sa mobile unit.
Ginpahayag dugang nga pwedeng mapasabat sa kasong kriminal ag administratibo ro limang pulis engkasong makitaan it baeasihan ro reklamo ni Magsusi.
Nasyauran nga ro lima hay ginpatalsik sa 2nd Aklan Provincial Mobile Company (APMC) sa banwa it Buruanga ag temporaryong gin-deploy sa 1st APMC sa banwa it Libacao agud nga indi maimpluwensiyahan ro pagahimuon nga imbestigasyon sa insidente.
Sa pihak nga parte, ginpasiguro ni Atty. Celis nga igapursige gihapon nanda ro imbestigasyon agud nga matapna eon ro mga reception rites sa linyada it pulisya nga sangka pag-eabag sa anti-hazing law.
