KALIBO, Aklan—Nagpanawagan si P/Lt. Col. Belshazzar Villanoche, hepe it Kalibo Municipal Police Station sa mga pumueuyu nga hugut nga magsunod sa ginapatuman nga minimum health safety protocol eabi eon kon naga-agto sa mga matawong lugar.
Ro panawagan ni Villanoche hay matapos nga may mga nadadakpan sa gihapon ro mga kapulisan nga owa nagasuksok it face mask ag face shield nga klarung pag-eabag sa ginpaguwa nga executive order ni Governor Florencio Miraflores.
Importante man suno kana nga mag-obserba it social distancing nga kaeabanan nga nakakalipatan eon.
Bangud kara, hinyu it PNP sa publiko, magsunod sa health protocol bangud nga mataas sa gihapon ro paeag it Covid-19.
Gindugang pa ni Villanoche nga nagdeploy imaw it mga kapulisan agud nga mapabaskog ro andang police visibility eabi eon sa mga lugar nga posibleng makaangkon it mass gathering kapareho it public market ag shopping center.
Ginatutukan man nanda ro mga pampublikong saeakyan kun sa siin ro driver ro ginapapanaugan it multa kon may madakpan nga pasahero nga owa it face mask ag face shield.
Owa sigon nanda ginapa-eampas ro mga ‘alibi’ nga nakalipatan ro pagdaea it face mask ag face shield banguid nga mabuhay eon raya nga guidelines.
Ro pagsunod sigon sa nasambit nga patakaran hay owa eamang nagaprotekta sa kaugalingon kundi maskin sa iba pang miyembro it pamilya.
