KALIBO, Aklan—Sangka eaeaki ro nagsurender it anang bukon it lisensiyadong baril sa kapulisan bangud sa pagkabaeaka nga mabutang raya sa aeang-aeang nga sitwasyun sa isla it Boracay.
Suno kay P/Lt. Dexryl Tortuya it Aklan Provincial Mobile Force Company nga naka-deploy sa Boracay nga boluntaryo nga gindaea kanda it owa eon ginpangaeanan nga residente it Brgy. Manoc-Manoc sa isla it Boracay ro anang Caliber .357 nga owa it bala.
Ginasugid nga ro baril hay owa it nagakaigo nga serial number ag may tatak nga Smith and Wesson.
Gindaea ro baril sa Malay Municipal Police Station para sa nagakaigo nga documentation ag ginturn-over sa 2nd APMFC Headquarters para sa safekeeping.
Raya hay resulta it sigidas nga information dissemination pinaagi sa dayalogo, pulong-pulong ag distribution it anti-criminality IEC materials sa publiko angot sa best practices nga proyektong “Armas Islan Bugas”, kun sa siin ro igasurender nga armas hay katumbas it sangka kaso nga bugas.
Ro programa hay ginlunsar agud nga matapna ro pagkalhit it loose ag mga improvised ukon homemade firearms ag makahaealit nga pampasabog.
Angot kara, padayun ro pag engganyo it mga otoridad sa mga nagahupot it owa naka-rehistro ukon loose firearms ag mga homemade firearms kamana man ro explosives nga i-surrender raya sa pinakamaeapit nga police station.
Ginpasiguro nga owa it anuman nga igapasaka nga criminal case kontra sa nagapanag-iya it baril.
